Transferimi i Jasir Asanit nga Koreja e Jugut në Japoni ka dështuar pasi Gwangju dhe Yokohama nuk kanë arritur marrëveshje për sulmuesin e krahut.
Edhe pse ishin në negociata tashmë disa javë, Gwangju nuk ka pranuar ofertën e Yokohmas për Asanin, i cili ishte i gatshëm për t’u zhvendosur në Japoni.
Arsyet e dështimit të marrëveshjes nuk janë dhënë, por Gwangju ka bërë të ditur se do t’i marrë parasysh të gjitha ofertat tjera për 30-vjeçarin, që ka kontratë deri në fund të këtij viti.
Asani prej janarit të vitit 2023 është pjesë e ekipit nga Koreja e Jugut, ndërsa ka treguar paraqitje të mira këtë sezon në kampionat.
Në 18 ndeshje të luajtura deri më tani, Asani ka shënuar 6 gola dhe ka bërë 2 asistime.
Para se të transferohet në Korenë e Jugut, Asani ka bërë karrierë në Hungari, Shqipëri, Suedi dhe Maqedoni të Veriut.
