Asamblistja e Kuvendit Komunal në Gjilan nga radhët e Lidhjes Demokratike të Kosovës, Gresa Avdiu ka njoftuar se është ofenduar nga kryesuesi i kuvendit, Arianit Sadiku, i cili është nga partia udhëheqëse në këtë komunë, Lëvizja Vetëvendosje.
Sipas saj, fjala i është mohuar dy herë radhazi në seancë dhe ka pritur 6 orë për të diskutuar. Ajo ka thënë se nuk e ka ofenduar Sadikun as kur ai ka gënjyer publikisht qytetarët e Gjilanit dhe përfaqësuesit e tyre, raporton teve1.info.
“Unë, i nderuar kryesues, nuk të kam ofenduar as kur ma ke mohuar fjalën dy seanca radhazi, as kur ma ke dhënë fjalën pas 6 orë pritjeje. Madje, nuk të kam ofenduar as kur ke gënjyer publikisht qytetarët e Gjilanit dhe përfaqësuesit e tyre”, ka thënë Avdiu.
Asamblistja përmes një postimi në Facebook është shprehur se është për keqardhje niveli ku ka arritur shoqëria.
“Është për keqardhje niveli ku kemi arritur si shoqëri, por le të mbetet në supet e juaja dhe gjithë atyre që ofendojnë gjininë e butë, përgjegjësia e ofendimeve publike që bëni”.
Avdiu ka thënë se nuk është ofenduar vetëm ajo, por çdo vajzë e grua e Komunës së Gjilanit.
“Me këtë fjalë nuk më ke ofenduar vetëm mua, por çdo vajzë e grua të komunës sonë!”, ka thënë ajo.
