Asambleja Kombëtare e Francës po voton të martën një projektligj historik që do t’u lejonte të rriturve me sëmundje të pashërueshme të kërkojnë ilaçe vdekjeprurëse për të përfunduar jetën në mënyrë të kontrolluar.
Nëse miratohet nga shumica e ligjvënësve, projektligji do t’i dërgohet Senatit për debat të mëtejshëm.
Sipas masës së propozuar, vetëm personat mbi 18 vjeç që janë shtetas francezë ose rezidentë dhe vuajnë nga një sëmundje e avancuar, e pashërueshme dhe që shkakton dhimbje të patolerueshme, do të kenë të drejtë të kërkojnë këtë opsion.
Ata me çrregullime psikiatrike ose sëmundje si Alzheimeri do të përjashtohen, ka shkruar AP.
Pacientët do të duhet të konfirmojnë kërkesën pas një periudhe reflektimi. Nëse aprovohet, mjeku do të japë një recetë për ilaçin, i cili mund të merret në shtëpi ose në ambiente të kujdesit shëndetësor.
Po ashtu, do të votohet një projektligj tjetër për përmirësimin e kujdesit paliativ.
Një votim përfundimtar mbi masën mund të zgjasë me muaj për t’u planifikuar në mes të procesit të gjatë dhe kompleks legjislativ të Francës. Asambleja Kombëtare ka fjalën e fundit mbi Senatin.
Më herët këtë muaj, Macron sugjeroi se mund t’u kërkonte votuesve francezë ta miratonin masën nëpërmjet referendumit nëse diskutimet në parlament dalin jashtë rrjedhës së duhur.
Udhëheqësit fetarë francezë lëshuan këtë muaj një deklaratë të përbashkët për të denoncuar projektligjin, duke paralajmëruar për “rreziqet” e një “çarjeje antropologjike”.
Konferenca e Udhëheqësve Fetarë në Francë (CRCF), e cila përfaqëson komunitetet katolike, ortodokse, protestante, hebraike, myslimane dhe budiste, tha se masat e propozuara rrezikojnë të ushtrojnë presion mbi të moshuarit dhe ata me sëmundje ose aftësi të kufizuara.
Vetëvrasja e asistuar lejohet në Zvicër dhe në disa shtete të SHBA-së. Eutanazia është aktualisht e ligjshme në Holandë, Spanjë, Portugali, Kanada, Australi, Kolumbi, Belgjikë dhe Luksemburg në kushte të caktuara.
