Studentët e Fakultetit të Arteve shfaqën interesim të madh për të ndjekur një sesion informues mbi punën dhe misionin e Institutit për Krimet e Kryera gjatë Luftës në Kosovë.
Para studentëve, punën e këtij institucioni e prezantuan Drejtoresha e Departamentit të Hulumtimeve, Greta Avdyli, dhe Udhëheqësi i Divizionit për Shërbime të Përdoruesve, Leutrim Sahiti.
Avdyli theksoi se arkivi i institutit paraqet një mundësi të rëndësishme për artistët e rinj, të cilët mund të shfrytëzojnë materialet e mbledhura për krijimin e filmave artistikë, dokumentarëve dhe ekspozitave të ndryshme.
“Komuniteti i ri artistik e ka mundësinë të realizojë dokumentarë dhe filma të metrazhit të gjatë e të shkurtër, duke u bazuar në materialet që i posedojmë”, ka thënë Avdyli
Ndërkaq, Sahiti tha se Instituti ka arritur të grumbullojë një sasi të madhe materialesh që dokumentojnë ngjarjet kyçe lidhur me luftën në Kosovë.
Ai shpjegoi gjithashtu mënyrën se si studentët mund të kenë qasje në këto burime.
“Kemi materiale të shumta që kemi grumbulluar në Institut, duke filluar nga incizimet e ish-ushtarëve të Ushtrisë Çlirimtare të Kosovës deri te dokumentimi i masakrave të kryera në zona të ndryshme të vendit”, është shprehur Sahiti.
Gjatë luftës së viteve 1998–1999 në Kosovë u vranë më shumë se 13.000 civilë, kryesisht shqiptarë.
Serbia vazhdon të refuzojë ballafaqimin me të kaluarën, duke mos kërkuar falje për krimet e kryera në Kosovë.
