Shkuarjen e kryeministrit Kurti në Sarajevë, presidenti i entitetit të Republikës Serbe në Bosnje Hercegovinë, e quajti provokim të hapur. Shkak i kësaj, u anulua edhe Samiti i Liderëve të Ballkanit Perëndimor dhe Bashkimit Evropian.
Është anuluar Samiti i Liderëve të Ballkanit Perëndimor dhe Bashkimit Evropian, që parashihej të mbahej në datat 4 – 5 dhjetor, në Bosnjë Hercegovinë.
Shkaku i kësaj, rezulton të jetë pjesëmarrja e kryeministrit të Kosovës, Albin Kurti, gjë e cila u kundërshtua nga ministrat e Republikës Serbe.
Anulimin e këtij samiti, e konfirmoi zëdhënësi i Qeverisë së Kosovës.
“Për shkak disa problemeve të cilat tashmë i ka bërë të njohura organizatori, ky samiti është anuluar. Megjithëkëtë, kryeministri do të realizojë një vizitë të shkurtër në Sarajevë, ku do të ketë takime me përfaqësues të institucioneve dhe përfaqësues politik”, tha Përparim Kryeziu.
Kundër kësaj vizite, ishte shprehur edhe presidenti i entitetit të Republikës Serbe në Bosnje Hercegovinë, Milorad Dodik.
“Kjo vizitë është provokim i hapur, një fyerje për të gjithë serbët dhe konfirmim se Sarajeva po përdoret si platformë për zbatimin e politikave që nuk kanë të bëjnë asgjë me paqen, bashkëpunimin dhe respektimin e të drejtave”, tha Dodik.
Kjo qasje vlerësohet se nuk i kontribuon paqes mes vendeve të rajonit.
“Është thjeshtë destruktive, kundër paqes dhe stabilitetit të vendeve në Ballkan, zhvillimin e marrëdhënieve më të mira të këtyre vendeve, posaçërisht në relacionin Kosovë – Bosnje – Serbi, që është lidhje nga Kremlini, Beogradi e deri të Dodiku. Pra, është një sjellje arrogante e një eksponenti i cili dihet se çfarë të kaluare ka dhe çfarë orientimi ka”, shprehet Mazllum Baraliu.
Bosnje e Hercegovina dhe Kosova nuk e kanë njohur njëra-tjetrën për shkak të kundërshtimit të Republikës Serbe, në krye të së cilës është Dodik.
