Numri i viktimave nga operacioni ushtarak amerikan i zhvilluar të shtunën në Venezuelë ka arritur në 80, bëri të ditur të dielën gazeta New York Times.
Sipas një zyrtari të lartë venezuelian, të cituar nga Times, ekziston mundësia që bilanci i të vdekurve të rritet edhe më tej.
Më herët, ministri venezuelian i Mbrojtjes, Vladimir Padrino, deklaroi se një pjesë e konsiderueshme e forcave të sigurisë së Presidentit të Venezuelës, Nicolas Maduro, ishte eliminuar gjatë operacionit amerikan, pa specifikuar numra konkretë, sipas Anadolu.
Ndërhyrja ushtarake e SHBA-së ndaj Venezuelës çoi në arrestimin e Maduros dhe bashkëshortes së tij, Cilia Flores, ku trump tha më pas se Shtetet e Bashkuara do të vendosin “kontrollin amerikan” mbi vendin përkohësisht, përfshirë dislokimin e trupave amerikane nëse do të jetë e nevojshme.
Çifti mbërriti në Nju Jork vonë të shtunën dhe aktualisht po mbahet në Qendrën Metropolitan të Paraburgimit në Brooklyn.
Ata përballen me akuza federale në SHBA që lidhen me trafik droge dhe bashkëpunim të dyshuar me banda të shpallura si organizata terroriste.
