Një milionë euro është vlera e skemës së nënshkruar mes KIESA dhe LuxDev për skemën e granteve për energji të pastër.
Në nënshkrimin e kësaj marrëveshje kanë marrë pjesë ambasadori i Luksemburgut në Kosovë, Eric Dietz, ministrja në detyrë e Industrisë, Ndërmarrësisë dhe Tregtitë, Rozeta Hajdari dhe ministrja në detyrë e Ekonomisë, Artane Rizvanolli.
Ministrja në detyrë e Industrisë, Ndërmarrësisë dhe Tregtisë, Rozeta Hajdari tha se nga kjo skemë do të përfitojnë ndërmarrjet mikro, të vogla dhe të mesme.
“Qëllimi i kësaj konference është që t’i njoftojmë bizneset për nënshkrimin e marrëveshjes për zbatimin e skemës së granteve për energji të pastër, për përkrahjen financiare të ndërmarrjeve mikro, të vogla dhe të mesme, e cila vjen si rezultat i mbështetjes financiare nga shteti mik i Kosovës – Luksemburgu, në vlerë prej 1 milion euro vetëm kjo skemë. Kjo skemë do të zbatohet nga Agjencia për Investime dhe Përkrahjen e Ndërmarrjeve në Kosovë (KIESA) në kuadër të Ministrisë së Industrisë, Ndërmarrësisë dhe Tregtisë, si pjesë e projektit KSV/024, e zbatuar nga Agjencia e Luksemburgut për Bashkëpunim, Zhvillim dhe në bashkëpunim të ngushtë me Ministrinë e Ekonomisë”, tha ajo.
Ndërkaq, ministrja në detyrë e Ekonomisë, Artane Rizvanolli tha se kjo marrëveshje vjen në kohën kur, siç tha ajo, mbi 700 biznese po operojnë në treg të lirë të energjisë.
“Kjo skemë vjen në kohën kur në Kosovë po zbatohet faza e dytë e liberalizimit të tregut, ku mbi 700 kompani operojnë tashmë në treg që nga 1 qershori i këtij viti dhe nuk është e rastësishme që në dizajnin e kësaj skeme do të kemi kujdes të shtuar për ndërmarrjet që operojnë në treg të liberalizuar edhe pse duhet ta ceki që ndërmarrjet tjera nuk janë të përjashtuara. Kjo është edhe një përpjekje e Qeverisë së Kosovës në bashkëpunim me partnerët, në këtë rast me LuxDev që të mbështes ndërmarrjet prodhuese dhe ta lehtësojë tranizicionin energjetik për ndërmarrjet prodhuese të Kosovës”, u shpreh Rizvanolli.
Ndërkaq, ambasadori i Luksemburgut në Kosovë, Eric Dietz tha se kjo skemë do të mbështes bizneset private.
“Me buxhetin prej një milioni për energji të pastër shënon një hap të përkushtimit tonë të përbashkët për të avancuar tranzicionin e Kosovës në energji. Kjo skemë do t’i ofrojë mbështetje të drejtpërdrejt sektorit privat, duke u mundësuar kompanive që të investojnë në energji solare, duke përmirësuar efiçiencën e energjisë por po ashtu edhe avancimin e procesit të prodhimit për të reduktuar humbjen e energjisë. Këto janë masa me të cilat do të ndihmojmë për të pasur kosto më të ulët për energji, të fuqizojmë konkurrencën dhe të kontribuojmë po ashtu për tranzicionin në energji të pastër në Kosovë”, përfundoi ai.
Vendimi i ZRRE-së për daljen e bizneseve të mëdha në tregun e lirë për energji ka hyrë në fuqi nga qershori, vendim ky i cili është kundërshtuar vazhdimisht nga bizneset dhe komuniteti i biznesit. Tregu i hapur energjetik, sipas komunitetit të biznesit dëmton ekonominë e vendit dhe rrezikon mbylljen masive të vendeve të punës.
