Javën e nisi në hapësirat e Kuvendit.
E në takim po hyn me shpresën që kësaj radhe diçka do të ndryshojë.
“E kemi vullnetin e mirë, i kemi mundësitë reale”, ka thënë Kurti.
Kryeministri në detyrë, Albin Kurti e lideri i LDK-së, edhe këtë të hënë vazhduan bisedimet për presidentin.
E pas diskutimit një orësh, në holl dolën bashkë.
Në shoqëri me ta qe edhe Bekim Sejdiu.
Ky i fundit, nga marrëveshja e arritur, u prezantua si emër për president konsensual.
Abdixhiku tha se bisedimet nuk ishin të lehta.
Por sipas tij, vullneti ishte i dyanshëm.
“Nga të gjithë emrat që janë propozuar e shqyrtuar, në mesin e të cilëve të gjithë ishin individë të dalluar, gjatë diskutimeve të përbashkëta jemi dakorduar për një emër dhe ai është Profesor Doktor Bekim Sejdiu. Karriera e Profesor Doktor Sejdiut është e shquar dhe e pasur, me përvojë të ndryshme e pozita të rëndësishme”, u shpreh Kryetari i LDK-së Abdixhiku.
Pas tij, fjalën e mori kandidati për president, Bekim Sejdiu.
Ai para medieve dha edhe arsyet se pse e pranoi këtë ofertë.
“Besimi që më kanë dhënë përfaqësuesit e dy partive është nder i madh. Unë e kam pranuar këtë propozim, ndonëse ambicia ime ka qenë në fushat akademike dhe profesionale. Por, sidoqoftë, duke qenë plotësisht i vetëdijshëm edhe për barrën dhe përgjegjësinë që sjell posti i presidentit, jam vënë në shërbim të Republikës së Kosovës dhe të qytetarëve të Kosovës, që të shërbej me devotshmëri”, ka thënë kandidati për president nga LVV dhe LDK, Bekim Sejdiu.
Abdixhiku dhe Sejdiu nuk pranuan të marrin pyetje nga gazetarët.
Ndërkaq, për këtë marrëveshje rreth presidentit, një prononcim nuk pati nga kryeministri në detyrë, Albin Kurti.
