Mesditën e së hënës një zyrtar i Komunës së Fushë Kosovës u arrestua nga Policia e Kosovës.
I.K dyshohet se keqpërdori pozitën zyrtare, derisa u premtoi disa personave se do t’u ndihmojë në përfitimin e disa subvencioneve.
E për këtë, nga Komuna e Fushë Kosovës thonë se nuk ishin në dijeni për veprimtarinë e tij, derisa kërkojnë të zbardhet e vërteta lidhur me këtë rast.
“Ne jemi njoftuar dje nga organet e hetuesisë, dhe sigurisht që nuk jemi ndier mirë për personin në fjalë por që organet do të merren me këtë rast, dhe ne do të presim të shohim zhvillimet e mëtutjeshme. Si Komunë dhe si Institucion do të ndërmarrim masa që nga sot, të bazuara në ligje fuqi dhe do të zhvillojmë procedurat e mëtutjeshme. Nuk kemi qenë në njohuri për veprimtarinë e personit në fjalë”, tah zëdhënës i Komunës së Fushë Kosovës, Ali Topalli.
Nga Komuna nuk japin detaje të tjera, derisa përmendin faktin se presin zhvillimin e hetimeve.
“Është arrestuar i dyshuari mashkull kosovar, pasi i njëjti në cilësi të zyrtarit komunal u ka marrë para viktimave meshkuj kosovarë, duke u premtuar se do t’u ndihmonte të plotësonin dokumentet dhe të merrnin subvencione nga komuna. Në konsultim me prokurorin i dyshuari pas intervistimit është dërguar në mbajtje”, thuhet në raportin e Policisë.
I dyshuari është intervistuar në prezencë të avokatit mbrojtës dhe me aktvendim të Prokurorit të Shtetit i njëjti është dërguar në mbajtje për 48 orë.
Kujtojmë se në fillim të vitit 2021 dhjetëra zyrtarë të Ministrisë së Bujqësisë, përfunduan në pranga si të dyshuar për keqpërdorim të qindra mijëra eurove në ndarje të subvencioneve.
Raporti i gazetares Lendrina Kodrolli.
