Inspektorati Policor i Kosovës (IPK), në bashkëpunim me Policinë e Kosovës, ka arrestuar mbrëmë një zyrtar policor me detyrë në Njësinë Speciale Operative.
Sipas njoftimit, i dyshuari është ndaluar për 48 orë me vendim të prokurorit të Prokurorisë Themelore në Mitrovicë, nën dyshimet për kryerjen e veprave penale “Keqpërdorim i pozitës apo autoritetit zyrtar” dhe “Armëmbajtje pa leje”.
Hetuesit e IPK-së, me autorizim të organeve të drejtësisë, kanë kryer bastisje në banesën e tij në Vushtrri, ku janë sekuestruar dëshmi relevante.
Në interes të hetimeve, IPK i ka rekomanduar Policisë së Kosovës suspendimin e zyrtarit të dyshuar.
“Hetimet po vazhdojnë në koordinim me prokurorin përgjegjës dhe priten veprime të tjera lidhur me rastin”, thuhet në njoftim./teve1.info/
