Një shtetas shqiptar është arrestuar nga autoritetet kroate, pasi u kap me më shumë se 700 mijë euro të padeklaruara, në një nga sekuestrimet më të mëdha të parave të gatshme në kufijtë e Kroacisë.
Sipas njoftimit të Doganës kroate, oficerët doganorë në bashkëpunim me policinë kufitare, kanë ndaluar automjetin në pikën kufitare Karasoviq, gjatë një kontrolli në dalje nga territori kroat.
Gjatë kontrollit të detajuar të automjetit të drejtuar nga shtetasi shqiptar, autoritetet gjetën 702,435 euro në para të gatshme, të fshehura në pjesë të ndryshme të makinës.
Sipas autoriteteve, shoferi nuk e kishte deklaruar shumën siç kërkohet me ligj – as në mënyrë të shkruar, as elektronike – pranë Administratës Doganore apo Policisë Kufitare.
Paratë janë sekuestruar, ndërsa i dyshuari është arrestuar për kontrabandë dhe është dërguar në paraburgim, në pritje të procedurave të mëtejshme ligjore.
