Një pjesëtar i Policisë së Serbisë është arrestuar të shtunën në pikëkalimin kufitar të Jarinjës, pasi në bagazhin e veturës së tij, me targa të Beogradit, iu gjetën 51 fishekë, 9 mijë e 900 euro dhe 26 mijë dinarë serbë.
Sipas Policisë së Kosovës, gjatë kontrollit u sekuestruan gjithashtu dokumente personale dhe materiale policore, përfshirë kartelën e identifikimit dhe distinktivin e Policisë së Serbisë, kartelën e sindikatës së policisë serbe, letërnjoftimet e Serbisë dhe Kosovës, pasaportën serbe, një palë uniformash, një palë dorëza dhe një USB.
Me vendim të prokurorit, i dyshuari është dërguar në mbajtje, ndërsa rasti është regjistruar si import, eksport, furnizim, transport, prodhim, këmbim, ndërmjetësim ose shitje e paautorizuar e armëve apo materialeve plasëse.
“Në vendkalimin kufitar në hyrje është arrestuar i dyshuari mashkull kosovar pjesëtar i policisë së Serbisë, për shkak se në veturën me targa të Beogradit të cilën ishte duke e drejtuar gjatë kontrollit në bagazhi janë gjetur dhe konfiskuar 51 fishek, 9.900 euro para të gatshme dhe 26.000 dinar serb. Nga i dyshuari janë sekuestruar dokumente personale si kartela e identifikimit së bashku me distinktivin e policisë së Serbisë, kartelën e sindikatës së policisë serbe, letërnjoftimi i Serbisë dhe Kosovës, pasaporta e Serbisë, një palë spaleta të uniformës, një palë dorëza dhe një USB. Me vendim të prokurorit i dyshuari është dërguar në mbajtje. Rasti është duke u hetuar”, thuhet në raportin 24-orësh të Policisë./teve1.info/
