Një person është arrestuar mbrëmjen e së mërkurës në Brezovicë, nën dyshimin për posedim të substancave narkotike.
Sipas Policisë, më 19 gusht 2026, rreth orës 23:30, njësitet policore të Stacionit Policor në Shtërpcë kanë pranuar një informatë lidhur me gjetjen e një substance të dyshuar narkotike në një vilë të pabanuar në Brezovicë.
Pas pranimit të informatës, policia ka dalë në vendin e ngjarjes dhe gjatë kontrollit të një personi të dyshuar, mashkull, shtetas i Kosovës, 27 vjeç, janë gjetur substancë e dyshuar narkotike e llojit marihuanë dhe dy peshore digjitale.
Nën dyshimin se personi mund të posedonte edhe substanca të tjera narkotike, policia ka kontrolluar edhe një vilë tjetër, ku është gjetur një sasi tjetër e dyshuar marihuane.
Si prova materiale janë konfiskuar gjithsej 1,063 gramë substancë e dyshuar narkotike e llojit marihuanë, dy peshore digjitale, një çantë krahu e zezë, një thikë metalike dhe një telefon celular.
Për rastin është njoftuar Drejtoria për Hetimin e Narkotikëve, e cila ka marrë përsipër procedimin e mëtejshëm.
Po ashtu, është njoftuar prokurori i shtetit, i cili ka autorizuar intervistimin e të dyshuarit dhe ka lëshuar aktvendim për ndalimin e tij për 48 orë, për procedura të mëtejshme hetimore./teve1.info/
