Prokuroria Themelore në Prishtinë, ka njoftuar se në koordinim me Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsion në Prishtinë, ka arrestuar një person të dyshuar për keqpërdorimin dhe mashtrimin në një aktivitet prokurimi për furnizime me pajisje në Policinë e Kosovës.
Prokuroria ka bërë të ditur se sipas dyshimeve fillestare, i dyshuari me inicialet N.R, është duke u hetuar për veprat penale “Keqpërdorimi dhe Mashtrimi në Prokurim Publik nga neni 415 të Kodit Penal të Republikës së Kosovës, dhe Falsifikimi i dokumenteve nga neni 390 të KPRK-së”.
Sipas njoftimit, arrestimi është realizuar nga Policia e Kosovës, ndërsa me urdhër të prokurorit të shtetit, personi i dyshuar është ndaluar për 48 orë./teve1.info/
