Një person është arrestuar në fshatin Verban të Vitisë, pasi gjatë kontrollit në shtëpinë e tij Policia e Kosovës ka gjetur dhe konfiskuar armë dhe municion.
Sipas raportit 24-orësh të Policisë, rasti ka ndodhur më 29 tetor 2026, rreth orës 14:20.
Gjatë kontrollit, zyrtarët policorë kanë sekuestruar një armë të tipit AK-47, dy karikatorë dhe 85 fishekë të kalibrit 7.62 mm. Po ashtu, është gjetur edhe një pistoletë me dy karikatorë dhe tetë fishekë të kalibrit 9 mm.
Përveç armëve dhe municionit, Policia ka konfiskuar edhe një gëzhojë dhe një bajonetë të armës AK-47.
I dyshuari është arrestuar dhe, pas intervistimit, me vendim të prokurorit është dërguar në mbajtje.
Rasti është iniciuar për veprën penale “Mbajtja në pronësi, kontroll ose posedim i paautorizuar i armëve”.
“Fsh. Verban, Viti, 29.10.2026 – 14:20. Është arrestuar i dyshuari mashkull kosovar, pasi që gjatë kontrollit në shtëpinë e tij janë gjetur dhe konfiskuar një AK-47, dy karikatorë, 85 fishekë të kalibrit 7.62 mm, një pistoletë, dy karikatorë, tetë fishekë të kalibrit 9 mm, një gëzhojë dhe një bajonetë e armës AK-47. Pas intervistimit, me vendim të prokurorit, i dyshuari dërgohet në mbajtje”, thuhet në raportin e Policisë së Kosovës.
