Një person është arrestuar të shtunën në Prishtinë, nën dyshimin për falsifikim dokumentesh, mashtrim dhe veprime të tjera penale, lidhur me prona të menaxhuara nga Agjencia Kosovare e Privatizimit (AKP).
Në raportin 24-orësh të Policisë thuhet se, i arrestuari, në bashkëpunim me persona të tjerë, dyshohet se gjatë periudhës 2021–2024 ka falsifikuar dokumente për t’i transferuar pronat nga statusi shtetëror në pronësi private dhe më pas i ka shitur, duke mashtruar blerësit dhe përfituar shuma të konsiderueshme parash.
Gjatë kontrollave të kryera në një shtëpi, tri banesa dhe dy garazha, policia ka sekuestruar dokumente të shumta që lidhen me falsifikimet, si dhe pajisje të përdorura për prodhimin e dokumenteve të rreme.
Po ashtu, janë konfiskuar një pistoletë me 103 fishekë, një telefon celular, një orë dore “Rolex” dhe një zinxhir dore “Rolex”.
Pas intervistimit, i dyshuari është dërguar në mbajtje me vendim të prokurorit, ndërsa hetimet për rastin janë duke vazhduar.
“Më 01.11.2025 është arrestuar i dyshuari mashkull kosovar për shkak të dyshimit se ka kryer veprat penale të cekura më lartë. Dokumentet dyshohetet se janë falsifikuar lidhur me pronat e përfshira që kanë qenë nën menagjimin e AKP-së të cilat prona përmes dokumenteve të falsifikuara i dyshuari në bashkëkryerje me persona tjerë kanë arritë ti falsifikojnë dokumentet që në procedura për bartje dhe legalizim i kanë bartur nga prona shtetërore në pronësi private, pastaj i kanë shitur duke mashtruar blerësit dhe nga këto para kanë përfituar shuma të mëdha financiare. Janë bërë kontrolla në një shtëpi, tri banesa dhe dy garazha ku janë konfiskuar dokumente të ndryshme që kanë lidhje me falsifikime si dhe pajisje që janë përdorë për falsifikimin e dokumenteve. Gjatë operacionit është konfiskuar një pistoletë me 103 fishek, një telefon celular, një orë dore rolex dhe një zingjir dore rolex. I dyshuari pas intervistimit me vendim të prokurorit është dërguar në mbajtje”, njofton Policia në raportin 24-orësh./teve1.info/
