Policia e Kosovës ka arrestuar një person të dyshuar për dhunimin e një vajze të mitur në komunën e Malishevës. Rasti dyshohet të ketë ndodhur ditën e mërkurë, më 15 tetor 2025, ndërsa arrestimi i të dyshuarit është kryer një ditë më vonë.
Lajmi është bërë i ditur në raportin 24-orësh të Policisë së Kosovës, ku thuhet se:
“Më 16.10.2025 është arrestuar i dyshuari mashkull kosovar, për shkak të dyshimit se ka kryer veprën e lartcekur ndaj viktimës së mitur femër.”
Sipas autoriteteve, pas intervistimit në stacionin policor përkatës dhe konsultimit me prokurorin e çështjes, ndaj të dyshuarit është marrë masa e ndalimit policor.
“Me vendim të prokurorit, i dyshuari është dërguar në mbajtje,” thuhet më tej në raport.
Policia nuk ka dhënë më shumë detaje lidhur me identitetin e të dyshuarit apo viktimës, për shkak të ndjeshmërisë së rastit dhe moshës së viktimës.
Hetimet lidhur me këtë rast vazhdojnë, ndërsa Prokuroria ka nisur procedurat për zbardhjen e plotë të ngjarjes.
