Prokuroria Speciale e Republikës së Kosovës ka njoftuar se ka arrestuar të martën një person të dyshuar me inicialet A.B., nën dyshimin për përfshirje në veprën penale “shpëlarje e parave”.
Sipas njoftimit, i dyshuari është ndaluar për 48 orë.
“A.B. është ndaluar për 48 orë, nën dyshimin për kryerjen e veprës penale ‘shpëlarje e parave’”, thuhet në njoftim.
Prokuroria bën të ditur se i njëjti dyshohet se ka përfituar para përmes mashtrimeve ndaj qytetarëve në Gjermani dhe Kosovë, të cilat më pas i ka futur në sistemin bankar.
“I njëjti dyshohet se paratë e përfituara përmes mashtrimeve të qytetarëve të ndryshëm në Republikën e Gjermanisë dhe në Republikën e Kosovës, i kishte deponuar në formë të parasë së gatshme në llogaritë bankare të subjekteve në pronësi të tij”, thuhet më tej.
Autoritetet kanë bërë të ditur se brenda afateve ligjore do të kërkohet masa e paraburgimit ndaj të dyshuarit.
“Brenda afatit të paraparë ligjor, Prokuroria Speciale do të paraqesë kërkesën për caktimin e masës së paraburgimit në Gjykatën Themelore të Prishtinës, Departamenti Special”, përfundon njoftimi.
