Një person i dyshuar për përfshirje në veprat penale ’tregtia e ndaluar’ dhe prodhimi dhe shpërndarja e produkteve të dëmshme mjekësore’ është arrestuar të mërkurën në Ferizaj.
Sipas Policisë, hetuesit policorë nga Drejtoria për Hetimin e Krimeve Ekonomike dhe Korrupsionit – Sektori për Hetimin e Krimeve Ekonomike, kanë pranuar një informatë se persona të dyshuar janë duke prodhuar dhe shpërndarë në mënyrë ilegale produktin “Collagen Peptides 200 gr”, të cilin e shesin në mënyrë të paligjshme përmes rrjeteve sociale.
Pas pranimit të informatës, thuhet se në koordinim me Doganën e Kosovës janë ndërmarrë veprime hetimore në terren ku si rezultat janë lokalizuar dy posta të shpejta përmes së cilave janë shpërndarë produktet e falsifikuara.
Po ashtu bëhet e ditur se gjatë operacionit janë sekuestruar dhjetë thasë-paketime prej 6800 gr të mbushur me lëndë të parë, proteine “REALMASS” e cila pas ripaketimit në pako me të vogla (kuti plastike – imitim) online është shitur si Collagen, 1500 copë ambalazh plastik, imitim i paketimit origjinale të produktit, 11 pako të gatshme për shitje në treg, si dhe një sasi e konsiderueshme etiketash me mbishkrimin Collagen.
Në magjistralen Prishtinë– Pejë, te selia e njërës nga postat e shpejta, janë gjetur edhe 30 pako të porositura e të gatshme për t’ua dërguar klientëve, kurse në Lipjan, po ashtu të një postë tjetër e shpejtë, janë gjetur dhe konfiskuar tri pako të porositura e të gatshme për t’ua dërguar klientëve.
I dyshuari është intervistuar në prani të avokatit të tij mbrojtës dhe më pas me aktvendim të prokurorit kujdestar nga Prokuroria Themelore në Ferizaj është liruar në procedurë të rregullt.
