Një person i dyshuar për sulm ndaj zyrtarëve policorë dhe kontrabandim me mallra është arrestuar të mërkurën në Han të Elezit.
Sipas Policisë, njësia policore gjatë patrullimit ka vërejtur një automjet në të cilin ndodheshin dy të dyshuar dhe i ka urdhëruar për ndalim por që të njëjtit nuk e kanë respektuar urdhrin dhe kanë vozitur vrullshëm në drejtim të zyrtarëve policorë.
“Gjatë incidentit, me qëllim të parandalimit të rrezikut të drejtpërdrejt për zyrtarët policorë, njëri nga zyrtarët policorë ka përdorur pajisjen zyrtare (armën zyrtare) në drejtim të automjetit të dyshuar. Të dyshuarit kanë ikur nga automjeti dhe nga vendi i ngjarjes. Gjatë shikimit të vendit të ngjarjes aty është paraqitur një mashkull i dyshuar kosovar, i cili me vendim të prokurorit është arrestuar dhe është dërguar në mbajtje. Automjeti në të cilin kishte të ngarkuar mallra të kontrabanduara është sekuestruar. Lidhur me rastin janë informuar institucionet kompetente dhe rasti po trajtohet nga njësitet kompetente policore”, bëhet e ditur në raportin e Policisë.
