Një person në Mitrovicë është arrestuar si i dyshuar për kontrabandim të pajisjeve profesionale dentare në vlerë prej mbi 72 mijë euro.
Në komunikatën për media të Doganës së Kosovës thuhet se, i dyshuari për këto pajisje nuk posedonte as licencë për import dhe as dokumentacion të rregullt.
Po ashtu, bëhet e ditur se, shtetasi që vinte nga Gjermania kishte deklaruar se po importonte pajisje kuzhine, dollapa dhe ormana si pjesë e gjësendeve të tij personale.
“Pas zbulimit të këtij tentimi të kontrabandës, hetuesit doganorë kanë nisur menjëherë veprimet hetimore në koordinim me Prokurorinë derisa me urdhër të Prokurorit të Shtetit, është arrestuar personi i dyshuar, ndërsa procedurat ligjore janë në vijim. Dogana e Kosovës vazhdon të jetë e angazhuar në parandalimin e veprimtarive të paligjshme dhe mbrojtjen e tregut dhe sigurisë së qytetarëve”, thuhet në njoftim.
