Policia e Kosovës ka arrestuar një person të dyshuar për veprën penale “Lëndim i lehtë trupor”, lidhur me një incident të ndodhur më 14 shkurt 2026, rreth orës 01:20, në rrugën “Knjaz Millosh” në Mitrovicë të Veriut.
Sipas njoftimit zyrtar, Policia kishte pranuar informatë nga Spitali Rajonal në Mitrovicë të Jugut se një person kishte kërkuar trajtim mjekësor pasi ishte goditur me një guri, pas një konflikti verbal.
Arrestimi është kryer me urdhër të Prokurorit të Shtetit në adresën e tij të banimit në fshatin Prelluzh të komunës së Vushtrrisë.
“Pas një pune intensive hetimore me datë 16.02.2026 policia ka arrestuar një person të dyshuar për veprën në fjalë, ndërsa sot me date 18.02.2026 janë identifikuar edhe personat te tjerë të përfshirë në rastin e raportuar, te cilët ne vijim mbeten për tu intervistuar. Arrestimi i të dyshuarit LL.M (2005) është kryer me urdhër të Prokurorit të Shtetit në adresën e vendbanimit të tij në fshatin Prelluzh komuna e Vushtrrisë”, thuhet në njoftim.
Me vendim të Prokurorit të Shtetit, i dyshuari pas intervistimit është liruar në procedurë të rregullt.
Policia, në koordinim me Prokurorinë Themelore në Mitrovicë, pritet të ndërmarrë veprime të mëtejme lidhur me personat e tjerë të identifikuar.
“Policia e Kosovës mbetet e përkushtuar në luftimin e dhunës dhe sigurinë e qytetarëve gjithashtu inkurajon raportimin e rasteve të ngjashme në mënyrë që të ndërmerren veprimet e nevojshme ligjore”, theksohet në njoftim.
