Policia e Kosovës ka bërë të ditur se ka arrestuar një avokat me inicialet H.J., pasi që i njëjti dyshohet se ka kryer veprën penale “Ushtrim i ndikimit”.
38-vjeçari dyshohet se ka kërkuar dhe pranuar para në shumë prej 8 mijë eurove nga një palë në procedurë pranë Gjykatës Themelore në Gjilan, me premtimin që këto para të ia dhurojë kolegjit të gjyqtarëve në mënyrë të njëjtit të nxjerrin vendim në favor të palës së mbrojtur nga i dyshuari.
Policia thotë se pas intervistimit i dyshuari me vendim të prokurorit të shtetit është ndaluar për 48 orë.
“Hetuesit policorë nga Drejtoria për Hetimin e Krimeve Ekonomike dhe Korrupsionit (DHKEK), përkatësisht Sektori për Hetimin e Korrupsionit, në koordinim me Prokurorinë Themelore në Prishtinë, pas zhvillimit të hetimeve preliminare, sot më 08.06.2023 ka arrestuar personin e dyshuar H.J., (avokat, mashkull kosovar, viti i lindjes 1985), pasi i njëjti dyshohet se ka kryer veprën penale ‘ushtrim i ndikimit’”, thuhet në njoftimin e Policisë. /teve1.info/
