Policia në Shqipëri ka njoftuar se në aeroportin e Tiranës ka arrestuar një 35-vjeçar kosovar, i cili ka qenë i shpallur në kërkim nga autoritete belge për veprën penale “vjedhje me dhunë”.
I arrestuari thuhet se është D.R., banues në Kosovë.
“I akuzuar nga autoritetet belge, për vjedhje me dhunë, ndalohet në dalje, me qëllim ekstradimin në Belgjikë, 35-vjeçari. Si rezultat i kontrolleve të detajuara në hyrje/dalje të RSH-së dhe në zbatim të masave të përcaktuara në planin operacional ‘Sundimi i ligjit’, u finalizua operacioni policor i koduar ‘Gate’, gjatë të cilit shërbimet e Komisariatit të Policisë Rinas ndaluan në dalje, shtetasin e shpallur në kërkim ndërkombëtar: D. R., 35 vjeç, banues në Kosovë”, thuhet në njoftim.
Ky shtetas ishte shpallur në kërkim ndërkombëtar, pasi thuhet se autoritetet belge i kishin caktuar masën e sigurisë “arrest në burg”, për veprën penale “vjedhja me dhunë”.
Sipas njoftimit të Policisë janë duke vazhduar procedurat për ekstradimin tij në Belgjikë.
