Policia e Kosovës ka arrestuar një person të kërkuar nga organet e drejtësisë, në kuadër të aksioneve të vazhdueshme për lokalizimin dhe kapjen e personave të dyshuar apo të dënuar për vepra të ndryshme penale.
Arrestimi është kryer mbrëmjen e së martës në Fushë-Kosovë, ku zyrtarët policorë kanë ndaluar A.S., ndaj të cilit ishin lëshuar katër urdhëresa nga gjykata.
Sipas Policisë, i dyshuari kërkohej për veprat penale “Posedim i paautorizuar i narkotikëve, substancave psikotrope ose analoge” dhe “Falsifikim i parave”.
Pas përfundimit të procedurave të nevojshme, ndaj tij janë ekzekutuar urdhëresat gjyqësore në fuqi dhe ai është dërguar për vuajtjen e dënimit sipas vendimeve të organeve kompetente.
Policia ka theksuar se operacionet për identifikimin dhe arrestimin e personave të kërkuar do të vazhdojnë edhe në ditët në vijim./teve1.info/
