Policia e Kosovës ka arrestuar në Ferizaj një shtetas të Maqedonisë së Veriut, i cili rezultonte person i kërkuar ndërkombëtarisht përmes INTERPOL-it.
Sipas njoftimit të Policisë, arrestimi u realizua nga Drejtoria për Bashkëpunim Ndërkombëtar Policor, në bashkëpunim me Drejtorinë për Migrim dhe të Huaj dhe Stacionin Policor në Ferizaj.
I arrestuari ishte subjekt i një urdhërarresti ndërkombëtar të lëshuar nga autoritetet e Maqedonisë së Veriut, nën dyshimin për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Pas arrestimit, rasti i është përcjellë prokurorit kompetent.
Me urdhër të tij, personi është dërguar në ndalim policor për 48 orë, ndërsa procedurat e mëtejshme ligjore do të vijojnë sipas legjislacionit në fuqi./teve1.info/
