Prokuroria Themelore në Mitrovicë, në koordinim me Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit, ka arrestuar një mjek në Vushtrri me iniciale A.V., me dyshimin për kryerjen e veprës penale “Marrja e ryshfetit”.
Sipas njoftimit zyrtar, hetimet për këtë rast kanë zgjatur disa muaj dhe janë zbatuar masa të veçanta hetimore.
“I njëjti akuzohet se në këmbim të mjeteve monetare ka lëshuar vërtetime të ndryshme mjekësore për qytetarët,” thuhet në njoftim.
Me vendim të prokurorit, personit të arrestuar i është caktuar masa e ndalimit prej 48 orësh, ndërsa hetimet janë në vazhdim.
