Edukimin e fëmijës të tyre, ia besuan këtij kopshti.
Por, më tu kthyer në shtëpi, një dyvjeçare alarmoi prindërit.
Vajza me gjestikulacione, tregoi se mësuesja e kopshti ushtroi dhunë fizike ndaj saj.
Për këtë, prindërit iu drejtuan menjëherë stacionit policor në Pejë.
Këta të fundit fillimisht sekuestruan pamjet e kamerave të sigurisë.
Në to, panë mësuesen teksa godet disa herë fëmijën në fytyrë.
Për këtë, Tëvë1 të enjten ka provuar të marrë një qëndrim nga drejtoresha e këtij kopshti në Pejë.
Por, një gjë e tillë ka qenë e pamundur, meqë punëtorët deklaruan se drejtuesit e kopshtit nuk ndodhen këtu.
E nga Prokuroria Themelore e Pejës, thanë se për këtë rast, mësuesja përfundoi në pranga.
“Fillimisht rasti është raportuar në Policinë e Kosovës, pas raportimit, prokurorja kujdestare e Departamentit e Përgjithshëm e ka autorizuar Policinë që të merren video-incizimet, ku kemi kuptuar se ka pasur dhunë ndaj një fëmijë, ku menjëherë edukukatorja është arrestuar dhe është ndaluar për 48 orë dhe ndërkaq brenda afatit ligjor do të parashtrohet edhe kërkesa për sigurimin e saj në procedurë penale”, ka thënë Nikçi.
Zëdhënësi i Prokurorisë Themelore në Pejë, Shkodran Nikçi thotë se prokuroria po interviston edhe disa persona të tjerë.
Kjo për të parë nëse është ushtruar dhunë sistematike ndaj fëmijëve.
“Bëhët fjalë për dhunë fizike ndërkaq gjendja e fëmijës për fat të mirë, është mirë, ndërkaq fëmija i moshës dy vjeçare me gjestikulacione u ka treguar fëmijëve që ka ushtruar dhunë mësuesja ndaj saj”, është shprehur tutje Nikçi.
Për këtë rast, detaje nuk dhanë as prindërit e dyvjeçares.
