Policia e Kosovës ka bërë të ditur se është arrestuar ish-krye-shefi i milicisë në Istog, pasi që i njëjti dyshohet për krime lufte kundër popullatës civile në periudhën gjatë viteve 1998-1999 në rajonin e Komunës së Istogut.
I dyshuari me inicialet M.P., është arrestuar sot në Pikën Kufitare të kalimit në Merdare, ku i njëjti me vendim të prokurorit është dërguar në mbajtje për 48 orë.
“Në vazhdën e angazhimeve hetimore është arritur të mblidhen dëshmi dhe prova për krimet dhe kryesit e këtyre veprave penale. Hetuesit policorë kanë pranuar dhe përpunuar informata të shumta operative në drejtim të identifikimit, vendndodhjes dhe lokalizimit të të dyshuarit, aktivitetit dhe lëvizjeve të tij, në dhe jashtë territorit të Kosovës”, thuhet në njoftimin e Policisë së Kosovës.
Tutje, është njoftuar se ky proces hetimor është ndihmuar nga zyrtarët e Agjencisë së Kosovës për Inteligjencë.
“Procesi hetimor është ndihmuar nga zyrtarët e Agjencisë së Kosovës për Inteligjencë me të cilët është bashkëpunuar ngushtë në një punë ekipore, ku është bërë përpunimi inteligjent i informatave. Nga bashkërendimi i aktiviteteve është bërë e mundur të identifikohet një i dyshuar për krime lufte, i cili në kohën e luftës 1998-1999 ishte krye-shef i milicisë në Istog”, thuhet në njoftimin e Policisë së Kosovës”, thuhet mes tjerash.
