Policia e Kosovës ka arrestuar gjashtë persona në fshatin Koshare të Ferizajt. Të njëjtit kanë përdorur armë e mjete të rrezikshme në një aheng familjarë.
Policia ka bërë të ditur se të dyshuarit i ka shoqëruar në stacionin policor, dhe me vendim të prokurorit gjashtë të dyshuarit janë ndaluar në mbajtje 48 orë, raporton teve1.info
“Policia e stacionit në Ferizaj me datën 27.07.2024 rreth orës 17:00 ka pranuar një informacion se në fshatin Koshare të Ferizajt, në një aheng familjarë kishte të shtëna me armë të zjarrit. Policët e rendit dhe hetuesit policorë menjëherë janë nisur në atë drejtim dhe kanë arritur të identifikojnë disa persona, tek të cilët janë gjetur armë të zjarrit, me të cilat dyshohet se kishin shtënë gjatë ahengut”, thuhet në njoftim.
Të dyshuarve si prove i janë sekuestuar katër armë të zjarrit, një pushkë gjysmëautomatike, tri pistoleta dhe sasi e monucionit.
“Policia i ka shoqëruar shtatë persona në stacionin e policisë në Ferizaj dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj, gjashtë persona janë ndaluar në mbajtje për 48 orë për procedura tjera hetimore, ndërsa si provë materiale janë sekuestruar katër armë të zjarrit, një pushkë gjysmëautomatike, tri pistoleta dhe sasi e municionit”, thuhet në njoftim.
Rasti është cilësuar “Përdorim i armës apo mjetit të rrezikshëm” , ” Armëmbajtje pa leje ” dhe “Shkaktimi i rrezikut të përgjithshëm”.
