Arkitekti S.B. në Drejtorinë e Urbanizmit dhe Mjedisit në Komunën e Ferizajt dhe përfituesi i projektit në këtë Komunë, H.H. janë arrestuar me dyshimin për keqpërdorim të detyrës zyrtare, raporton teve1.info
Sipas Policisë së Kosovës, i dyshuari arkitekt komunal S.B. në cilësinë e menaxherit të projektit ka keqpërdorur pozitën duke i nënshkruar kontratën pa e bërë verifikimin e punës dhe duke ia mundësuar të dyshuarit H.H. përfitimin material prej 67 mijë e 659 eurove.
“Policia e Kosovës, përkatësisht Drejtoria për Hetimin e Krimeve Ekonomike dhe Korrupsionit (DHKEK) dega në Ferizaj, pas veprimeve hetimore disa mujore ka arritur të siguroj dëshmi se i dyshuari S.B., m/k viti I lindjes 1963 me pozitë Arkitekt në Drejtorinë e Urbanizmit dhe Mjedisit Komuna e Ferizajt, në rastin konkret i caktuar si Menaxher i një projekti, ka keqpërdorur detyrën zyrtare, konkretisht ka nënshkruar situacionet dhe një aneks kontratë pa bërë verifikimin e punëve të kryera në teren, duke i mundësuar përfitim material të dyshuarit H.H., m/k viti I lindjes 1963.
Më këto veprime, i dyshuari S.B. duke mos zbatuar detyrimet dhe përgjegjësitë e Menaxherit të Projektit, dyshohet të ketë kryer veprën penale “Keqpërdorimi i pozitës apo autoritetit zyrtar’’, kurse I dyshuari H.H. si përfitues i tenderit dyshohet që në bashkëpunim me menaxherin e projektit, ka ofruar fatura dhe situacione për projektin e caktuar pa u kryer punimet në teren, duke i shkaktuar dëme buxhetit të Komunës së Ferizajt dhe Buxhetit të Republikës së Kosovës në vlerë prej 67.659.41€uro, dhe me këto veprime dyshohet të ketë kryer veprën penale ”Keqpërdorimi dhe mashtrimi me prokurim publik””, thuhet në komunikatë.
Sipas Policisë së Kosovës, të mërkurën të dyshuarit janë intervistuar në prani të avokatëve mbrojtës ku me urdhër të prokurorit kujdestar të njëjtit janë dërguar në mbajtje për 48 orë.