Sipas PK-së ai kishte tentuar të hyjë me forcë në banesën e ish-bashkëshortes, 23-vjeçare të cilës i ka shkaktuar lëndime trupore.
Ngjarja ka ndodhur në orët e para të mëngjesit të sotëm, ndërsa viktima është dërguar për trajtim mjekësor në Qendrën emergjente në Ferizaj.
“Sot, rreth orës 03:00 të mëngjesit, policia e stacionit në Ferizaj ka pranuar një informacion se në rrugën “Dëshmorët e Kombit’’ në Ferizaj ishte një rast i dhunës në familje dhe lëndimit trupor. Në lidhje me këtë, policët hetues të Njësisë së Dhunës në Familje menjëherë i kanë marrë veprimet e nevojshme, kanë dalë në vendin e ngjarjes dhe kanë arrestuar personin G.SH (M/K) i moshës 25 vjeçar, i cili duke tentuar të futet me dhunë në banesën e ish- bashkëshortes së tij SH.R ( F/K) e moshës 23 vjeçare, i kishte shkaktuar lëndime trupore. Viktima për ndihmë mjekësore është dërguar në Qendrën Emergjente në Ferizaj”, thuhet në njoftimin e policisë.
Policia të dyshuarin e ka shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit kujdestar nga Prokuroria Themelore në Ferizaj i njëjti është dërguar në mbajtje për 48 orë për procedura të mëtejme hetimore.
Rasti është cilësuar “Dhunë në familje dhe lëndim trupor”.
