Tre persona me inicialet B.S., F.S. dhe A.D. janë arrestuar në Prizren, nën dyshimet se janë të përfshirë në veprën penale “Fajde”.
Sipas një komunikate të përbashkët të Prokurorisë Themelore në Prizren dhe Policisë së Kosovës, B.S., përveç veprës penale të “fajdesë”, është i dyshuar edhe për veprat penale “shkaktim i rrezikut të përgjithshëm” dhe “aksident trafiku me lëndime”.
“Gjatë veprimeve operative të ndërmarra janë arrestuar 3 persona të dyshuar: B. S., F. S. dhe A. D. I dyshuari B. S. përveç veprës penale të ‘fajdesë’ është i dyshuar edhe për veprën penale ‘shkaktim i rrezikut të përgjithshëm’ dhe ‘aksident trafiku me lëndime’, pasi që gjatë tentimit të tij për të shmangur arrestimin, duke goditur me veturë ka lënduar një zyrtar policor dhe një qytetare”, thuhet në komunikatë.
Sipas komunikatës, të dyshuarit kanë ushtruar presion ndaj viktimës me qëllim të marrjes së interesit nga veprimtaria e fajdesë.
“Të dyshuarit lidhur me këtë rast në vazhdimësi kanë ushtruar presion ndaj viktimës, me qëllim të marrjes së interesit nga veprimtaria e fajdesë, duke e detyruar të veprojë në dëm të pasurisë së tij dhe si rezultat i veprimeve të kundërligjshme të dyshuarit i kanë shkaktuar dëme të konsiderueshme materiale viktimës.”, thuhet më tej në komunikatë.
Po ashtu, bëhet e ditur se janë kontrolluar edhe vendbanimet e të dyshuarve në tri lokacione të ndryshme në komunën e Prizrenit.
“Gjatë operacionit policor janë kontrolluar vendbanimet e të dyshuarve në 3 lokacione të ndryshme në komunën e Prizrenit, me ç‘rast janë sekuestruar dëshmi të ndryshme materiale, të cilat do të përdoren në procedurën penale”, bëhet e ditur nga policia dhe prokuroroa themelore në Pejë.
Ndaj të dyshuarve, siç bëhet e ditur në komunikatë, është caktuar masa e ndalimit prej 48 orësh.
Prokuroria Themelore në Prizren, sipas njoftimit, pritet që brenda afatit ligjor të parashtrojë kërkesë për caktimin e masës së paraburgimit ndaj të dyshuarve.
