Më shumë se 70 persona u arrestuan të shtunën në protestat në Mbretërinë e Bashkuar kundër shpalljes së grupit Veprimi për Palestinën (Palestine Action) si organizatë terroriste nga qeveria britanike pas një vandalizmi në një bazë të Forcave Ajrore Mbretërore.
Në Londër, Policia Metropolitane tha se 42 persona ishin arrestuar deri në fund të pasdites.
Të gjitha arrestimet, përveç njërit, ishin për shfaqje mbështetjeje për një organizatë të ndaluar, të cilën policia ka thënë se përfshin brohoritje, veshje ose shfaqje artikujsh të tillë si flamuj, tabela ose logo. Një person tjetër u arrestua për sulm të zakonshëm.
16 arrestime të tjera u bënë në Mançester, sipas Policisë së Mançesterit të Madh, ndërsa Policia e Uellsit të Jugut tha se 13 persona u ndaluan gjithashtu në Cardiff.
Në Londër, ishte java e dytë radhazi që protestuesit u mblodhën për të mbështetur grupin aktivist pro-palestinez. Nxjerrja e tij jashtë ligjit do të thotë që mbështetja për organizatën konsiderohet vepër penale. Policia arrestoi 29 persona në një protestë të ngjashme fundjavën e kaluar.
Pankarta me shkrimin “Unë kundërshtoj gjenocidin, unë mbështes Veprimi për Palestinën” u mbajtën lart në heshtje ndërsa protestuesit u rrethuan nga oficerë policie dhe anëtarë të medias.
Qeveria mori masa për të ndaluar Vperimin për Palestinën pasi aktivistët hynë me forcë në një bazë të Forcave Ajrore Mbretërore në Brize Norton në Oxfordshire të Anglisë, më 20 qershor, duke dëmtuar dy aeroplanë duke përdorur bojë të kuqe dhe leva në shenjë proteste ndaj mbështetjes së vazhdueshme ushtarake të qeverisë britanike për Izraelin në luftën e tij në Gaza.
