Lajmi u bë i ditur në një komunikatë të lëshuar nga Prokuroria Themelore në Gjilan, teksa tregohen edhe dyshimet që rëndojnë mbi të arrestuarit.
“Me datën 22 prill 2022, me aktvendim të Prokurorit të Shtetit në bashkëpunim me Policinë e Kosovës-NJHRKEK në Gjilan, janë ndaluar katër zyrtar të komunës së Novobërdës, për shkak të dyshimit se kanë kryer veprën penale keqpërdorim i pozitës apo autoritetit zyrtar nga neni 414 të Kodit Penal të Republikës së Kosovës”, thuhet në komunikatë.
Tutje bëhet e ditur se të dyshuarit kanë mundësuar marrjen e pagës për periudhën kohore prej tri viteve pa u paraqitur në punë.
“Të njëjtit dyshohen që me qëllim të përfitimi të kundërligjshëm pasuror, kanë mundësuar marrjen e pagës në periudhën kohore prej 3 viteve në shumë prej 13000 (trembëdhjetë mijë) euro pa u paraqitur në punë, duke dëmtuar buxhetin e Komunës së Novobërdës, në shumë e lartshënuar”, thuhet në komunikatë./teve1.info/
