Katër persona, njëri prej të cilëve zyrtar policor janë arrestuar si të dyshuar për posedim të paautorizuar të narkotikëve, ka njoftuar Inspektorati Policor I Kosovës.
Sipas IPK-së rasti raportohet të ketë ndodhur të mërkurën para mesnatës kur njësitë policore nga Stacioni Jugu në Prishtinë gjatë patrullimit në rrugën “Bejtush Gërbeshi” kanë ndaluar një veturë në të cilën ndodheshin katër të dyshuarit.
“Gjatë kontrollit të veturës janë gjetur 2 qese të vogla të mbushura me pluhur ngjyrë të bardhë që dyshohet të jetë substancë narkotike e llojit kokainë (me peshë 1.1 gram) dhe një qese e vogël që dyshohet të jetë substancë narkotike e llojit marihuanë (me peshë 1 gram). Gjatë kontrollit trupor te një nga pasagjerët është gjetur dhe konfiskuar një armë e kalibrit 7.65 mm dhe një karikator pa fishekë”, thuhet në njoftim.
Katër të dyshuarve i është caktuar masa e ndalimit prej 48 orëve, ndërkaq zyrtari policor është suspenduar.
