Policia e Kosovës në Vushtrri ka arrestuar katër persona të dyshuar për tri raste të vjedhjeve, të raportuara tri ditë më parë. Sipas njoftimit, të dyshuarit dyshohet se kanë vepruar në bashkëpunim me njëri-tjetrin dhe janë përfshirë në tri vjedhje në lokacione të ndryshme brenda komunës.
Cak i vjedhjeve kanë qenë materiale ndërtimore, mjete të amvisërisë, një telefon dhe gjësende të tjera. Disa nga sendet e vjedhura janë gjetur, përfshirë edhe telefonin, i cili i është kthyer pronarit legjitim.
Pas intervistimit, me vendim të prokurorit, njërit nga të dyshuarit madhor i është caktuar masa e ndalimit policor prej 48 orësh, ndërsa tre të dyshuarit tjerë, të mitur, janë liruar në procedurë të rregullt.
