Policia e Kosovës ka arrestuar katër persona, pasi që të njëjtit dyshohen se kanë djegur bredhin e Vitit të Ri në Komunën e Hanit të Elezit.
Të arrestuarit kishin vendosur edhe afishe në disa pjesë të rrugëve të qytetit me mbishkrimin “Viti i Ri nuk është festë e jona, mos festo festat e jo-myslimanëve”.
Në njoftim Policia e Kosovës ka bërë ditur se në vendin e ngjarjes kanë dalë njësitë policore si dhe ekipa e zjarrfikësve, të cilët kanë lokalizuar zjarrin që kishte kapluar bredhin.
Lidhur me këtë rast, policia thotë se kanë bashkëpunuar edhe me hetuesit dhe krimteknikët rajonal, të cilët nën autorizim të prokurorit kanë marrë veprime shtesë të hetimeve.
“Pas një pune intensive hetimore, grumbullimit të informacioneve në terren, shikimit të kamerave të sigurisë, rreth orës 17:00 policia ka arritur të identifikojë, e më pas të arrestojë katër persona të dyshuar, të cilët janë shoqëruar në stacionin e policisë. Pas intervistimit nga policët hetues, me vendim të prokurorit nga Prokuroria Themelore në Ferizaj, tre persona të dyshuar janë ndaluar në mbajtje, ndërsa një person është liruar për procedurë të rregullt hetimore, me dyshimin se kanë kryer veprën penale ‘Nxitja e përçarjes dhe mos durimit’, thuhet në njoftim./teve1.info/
