Policia e Kosovës ka njoftuar se ka arrestuar dy të rinj, pasi atyre gjatë një kontrolli në kuadër të operacionit “Goditja”, policia ua gjeti 82 qese marihuanë.
Siç njofton policia ata janë kapur rreth orës 03:15 në qytetin e Vitisë.
“Drejtoria rajonale e Policisë Gjilan, stacioni policor Viti me datën 31.08.2023 rreth orës 03:15 në kuadër të zbatimit të planit operacional ‘Goditja 2023’ në pikë të kontrollit në rrugën ‘Dëshmorët e kombit’ në qytetin e Vitisë ka ndalur një veturë me targa vendore, në të cilën ndodheshin dy të dyshuar meshkuj, kosovar shqiptar J.I. (viti i lindjes 2004) dhe N.M. (viti i lindjes 2003) për kontrolle rutinore”, thuhet në njoftim.
Në njoftimin e Policisë, thuhet se atyre u janë gjetur edhe një peshore digjitale, para të gatshme dhe 3 telefona celularë.
“Gjatë kontrollit janë gjetur dhe sekuestruar si prova materiale për gjykatë: 82 qese substancë narkotike e cila dyshohet të jetë e llojit marihuanë, 1 peshore digjitale, 1 pako me letra mbështjellëse ,,Rizlla’’ 205 euro para të gatshme dhe disa para të metalta dhe 3 telefon celularë”, thuhet në njoftim.
