Policia e Kosovës ka arrestuar dy persona të kërkuar me urdhër arreste ndërkombëtare.
Përmes një komunikate të lëshuar për media, Policia njofton se i arrestuari i parë ishte shtetas turk, ku ndaj të njëjtit është lëshuar urdhër arrest ndërkombëtar nga autoritetet e Turqisë, për veprën penale “Trafikim me Narkotik”.
Me ç’rast me urdhër të Prokurorisë Themelore në Gjilan, i arrestuari është dërguar në mbajtje për 48 orë.
“Policia e Kosovës, konkretisht ILECU-FAST KOSOVA, në vazhdën e bashkëpunimit policor ndërkombëtar me shtetet partnere, në dy raste të ndara ka arritur të arrestoj dy persona të kërkuar me urdhër arreste ndërkombëtare. Rasti 1; Me date 09.01.2024, si rezultat i një bashkëpunimi të mirë në mes të njësisë FAST dhe Stacionit Policor VITI, rreth orës 09:30 është ndaluar shtetasi Turk M.K., (viti i lindjes 1960) pasi që i njëjti rezultonte i kërkuar në bazë të urdhër arrestit ndërkombëtar të lëshuar nga autoritet e Turqisë, për veprën penale Trafikim me Narkotik, i dënuar në Turqi me 22 vite e 6 muaj burgim. Me urdhër të prokurorit kompetent të prokurorisë themelore në Gjilan, personi i kërkuar është dërguar në mbajtje për 48 orë”, thuhet në komunikatën e Policisë.
Njëherit, në Prishtinë është arrestuar shtetasi turk i dytë, po ashtu me urdhër arrest ndërkombëtar nga autoritetet e Turqisë, për veprën penale “Grabitje”.
Në këtë rast, me urdhër të Prokurorisë Themelore në Prishtinë, i arrestuari është dërguar në mbajtje për 48 orë.
“Me datë 09.01.2024, rreth orës 14:30, njësiti FAST, pas një pune operativo-hetimore me asistimin e Stacionit Policor Qendra në Prishtinë, ka bërë arrestimin e shtetasit Turk I.K., (viti i lindjes 1983), i kërkuar në bazë të urdhër arrestit ndërkombëtarë po ashtu të lëshuar nga autoritet e Turqisë , për veprën penale Grabitje , i dënuar nga po ky shtet me 10 muaj burgim. Me urdhër të Prokurorit kompetent të Prokurorisë themelore ne Prishtinë, personi i kërkuar është dërguar në mbajtje për 48 orë”, thuhet tutje në komunikatë.
Tutje, thuhet se pas përfundimit të procedurave ligjore ku janë të përcaktuara afatet kohore, personat në fjalë pritet të ekstradohen në Republikën e Turqisë.
“Policia e Kosovës, mbetet e përkushtuar në realizimin e detyrave dhe përgjegjësive të saj ligjore, përfshirë në fushën e bashkëpunimit ndërkombëtar policor”, thuhet në përfundim të komunikatës./teve1.info/.
