Policia e Kosovës ka arrestuar dy shtetas kosovarë në dy raste të ndara, të cilët kërkoheshin me urdhërarreste ndërkombëtare, të lëshuara nga autoritetet e Shqipërisë për vepra të ndryshme penale.
Sipas njoftimit zyrtar, më 23 prill 2026, Drejtoria për Bashkëpunim Ndërkombëtar Policor, në bashkëpunim dhe koordinim me njësitet policore të Drejtorisë Rajonale në Prishtinë, ka realizuar arrestimin e një personi të kërkuar përmes INTERPOL-it.
I njëjti kërkohej me urdhërarrest ndërkombëtar të lëshuar nga autoritetet e Republikës së Shqipërisë për veprën penale ‘Kontrabandë me migrantë”.
Ndërkohë, në një operacion tjetër të zhvilluar më 24 prill 2026, Drejtoria për Bashkëpunim Ndërkombëtar Policor, në koordinim me njësitet policore të Drejtorisë Rajonale në Pejë, ka arrestuar një tjetër shtetas kosovar, i cili po ashtu ishte në kërkim ndërkombëtar.
Shtetasi kosovar kërkohej përmes INTERPOL-it me urdhërarrest ndërkombëtar, të lëshuar nga autoritetet e Shqipërisë për veprën penale ‘Mashtrim përmes Call Center.
Policia ka bërë të ditur se të dy personat janë ndaluar për 48 orë, me urdhër të prokurorëve kompetentë./teve1.info/
