Policia e Kosovës ka arrestuar dy persona të dyshuar për posedim dhe shpërndarje të narkotikëve, si dhe armëmbajtje pa leje, pas një aksioni të zhvilluar në Prizren.
Sipas raportit 24-orësh të Policia e Kosovës, rasti ka ndodhur më 22 prill 2026 rreth orës 18:00, pas një hetimi disa mujor. Me urdhër të gjyqtarit, janë kontrolluar një shtëpi dhe dy lokale që dyshohet se shfrytëzoheshin nga dy të dyshuarit për paketim, shitje dhe shpërndarje të substancave narkotike.
“Gjatë kontrollit janë gjetur dhe sekuestruar: një motoçikletë, dy telefona mobil, një qelës me dy hallka, kartëmonedha në vlerë rreth 45 euro, 13 qese najloni me substancë të dyshuar narkotike të llojit kokainë me peshë rreth 336.92 gram, dy qese të zbrazëta me mbetje të kokainës, si dhe një kavanoz me substancë të dyshuar narkotike me peshë rreth 115.15 gram”, thuhet në raport.
Po ashtu, gjatë aksionit janë sekuestruar edhe mjete të tjera që dyshohet se përdoreshin për përpunimin dhe shpërndarjen e narkotikëve.
“Janë konfiskuar edhe dy foli, një palë gërshërë, një thikë, dy kartëmonedha nga 200 euro, një peshore digjitale, një pistoletë me një karikator të zbrazët, një pistoletë me pjesë të çmontuara pa karikator, si dhe një shishe qelqi me substancë të lëngshme të dyshuar për tretës”, theksohet më tej.
Sipas policisë, vlera e përgjithshme e substancave narkotike të sekuestruara arrin rreth 30 mijë euro.
“Të dyshuarit janë arrestuar dhe, pas intervistimit, me vendim të prokurorit janë dërguar në mbajtje”, përfundon njoftimi i policisë.
