Policia e Kosovës ka kapur në flagrancë dy persona në Podujevë duke u përkujdesur për bimët e dyshuara narkotike të mbjellura në një plantacion, në sasi prej 201 copësh.
Sipas komunikatës pas hetimeve të zhvilluar të dyshuarit janë kapur gjatë realizmit të një plani taktik.
“Me datën 06.07.2026 nga njësitë përkatëse policore është realizuar një plan taktik ku janë identifikuar dhe lokalizuar dy persona të dyshuar meshkuj kosovarë, të cilët janë zënë në flagrancë duke u përkujdesur për bimët e dyshuara të mbjellura në një plantacion, në sasi prej 201 copësh”, thuhet në komunikatë.
Lidhur me rastin është informuar prokurori kompetent, në konsultim me të cilin janë marrë mostra të nevojshme nga bimët e mbjella, ndërsa pjesa tjetër e tyre është shkatërruar në vendin e ngjarjes.
“Po ashtu me qëllim të sigurimit të provave relevante për rastin, janë kryer dy bastisje në shtëpitë e të dyshuarve të lartcekur, me ç’rast në njërën nga to është gjetur një qese e vogël e mbushur me substancë narkotike të dyshuar të llojit marihuanë në peshë prej 1.7 gramë”, thuhet tutje në komunikatë.
Në vendngjarje është bërë fotografimi dhe konfiskimi i dëshmive të gjetura si prova materiale, ndërsa të dyshuarit e arrestuar pas intervistimit janë dërguar në mbajtje.
