Policia e Kosovës ka njoftuar se sot gjatë realizimit të një aksioni janë arrestuar nëntë persona për prerje ilegale të drunjve në pjesën e Parkut Nacional “Sharri”.
Bëhet e ditur se 3 prej të dyshuarve me vendim të prokurorit janë ndaluar për 48-orë, kurse 6 të tjerë janë liruar në procedurë të rregullt.
“Në kuadër të këtij askioni janë arrestuar 9 persona , të cilët janë shoqëruar në stacionin policor në Shtërpcë dhe pas intervistimit nga policia, me vendim të Prokurorit të Prokurorisë Themelore në Ferizaj , 3 personat me inicialet L.N ( M/K) i moshës 20 vjeçar , A.A (M/K) i moshës 33 vjeçar dhe S.A (M/K) i moshës 35 vjeçar, janë ndaluar për 48 orë, ndërsa 6 personat tjerë janë liruar në procedurë të rregullt”, thuhet në njoftim.
Sipas policisë si prova materiale janë konfiskuar 5 traktor, disa motorsharra dhe sasi e drunjëve.
