U arrestua të martën nga Policia e Kosovës.
E nga e enjtja, Spartak Dërmaku gjendet në paraburgim.
Ai bashkë me dy persona tjerë, Arian Aliaj e Blerim Krasniqi, dyshohen për financim terrorizmi, shpëlarje parash e pjesëmarrje në krim të organizuar.
Megjithatë, mbrojtësi i Dermakut, Ilir Rama, pretendon se që nga arrestimi ka vërejtur disa mangësi në proces.
Madje, Rama tregon se vet Dërmaku i tha se nuk ka të bëjë me këtë rast.
Ai tregon se hetimet për këtë rast janë zhvilluar që prej vitit 2024, dhe tashmë organet e rendit i kanë në duar të gjitha materialet e nevojshme.
Rama paralajmëroi se do ta ankimojnë vendimin për paraburgim.
Tëvë1 raportoi gjatë ditës së djeshme për dosjen e Prokurorisë Speciale për këtë rast.
Në hetime është përfshirë edhe FBI, që madje doli edhe në teren bashkë me Policinë e Kosovës e Prokurorinë Speciale për arrestimin e të dyshuarve.
Në dosjen voluminoze të Prokurorisë Speciale, theksohet se nga një kohë e pacaktuar e deri më më 9 qershor 2026, të dyshuarit kishin vepruar në territorin e Zvicrës, Maqedonisë së Veriut, Kosovës e shtete tjera, dhe me dashje dhe dijeni i kryen veprat penale të financimit të terrorizmit, krimit të organizuar e shpëlarjes së parave.
