Kryetari i Mitrovicës së Veriut, Milan Radojeviq, është arrestuar dhe shoqëruar në Polici në kuadër të hetimeve që lidhen me dyshime për vandalizëm.
Lajmin e ka konfirmuar për Tëvë1 zëvendësdrejtori i Policia e Kosovës për rajonin e Veriut, Veton Elshani.
Sipas Elshanit, përveç kryetarit të komunës, në Polici është shoqëruar edhe kryesuesi i Kuvendit Komunal. Ai ka bërë të ditur se veprimet janë ndërmarrë në kuadër të hetimeve për një rast që lidhet me dyshime për vandalizëm.
Ndërkohë, gazetarja në terren, Florjeta Dërnjani, ka raportuar se menjëherë pas arrestimit të kryetarit dhe shoqërimit të kryesuesit të Kuvendit Komunal, para stacionit policor janë mbledhur një numër i madh mediash serbe, të cilat po përcjellin nga afër zhvillimet.
Deri më tani, autoritetet nuk kanë dhënë detaje shtesë lidhur me natyrën e dyshimeve për vandalizëm apo statusin procedural të të shoqëruarve. Hetimet për rastin janë duke vazhduar.
