Kapiteni Agim Vitia i angazhuar në Njësinë për hetimin e krimeve të luftës u suspendua nga puna më 2 shtator.
Ai dyshohej të kishte kryer veprën e rëndë penale të “spiunazhit”.
Mirëpo, rreth dy javë pas, ngjarja po del të jetë krejt ndryshe.
Tëvë1 përmes burimeve brenda Policisë së Kosovës, ka mësuar se ndaj kapitetit Vitia kanë pushuar hetimet, pasi nuk është provuar fajësia e tij.
Për këtë çështje, ka reaguar gjatë ditës edhe djali i kapitenit të policisë.
“Po ua rikujtoj kush është Agim Vitia, kapiteni i akuzuar: Në vitin 1998 mori armën dhe u rreshtua në Ushtrinë Çlirimtare të Kosovës, në Brigadën 153 ‘Hyzri Talla’, në ditët më të vështira për vendin. Pas luftës, nga viti 2000 shërbeu me përkushtim në Policinë e Kosovës, ku arriti gradën e kapitenit. Historia e një njeriu nuk matet me një titull gazete. Ne presim me padurim verdiktin e institucioneve përkatëse, dhe pas asaj, çdo shpifje, manipulim apo dëmtim i imazhit publik do të ndiqet ligjërisht në organet përkatëse”, ka shkruar ai.
Për të marrë më shumë detaje për këtë rast, Tëvë1 ka dërguar pyetje në Policinë e Kosovës, Inspektoriatin Policor, si dhe Prokurorinë Speciale, mirëpo deri në publikimin e kronikës nuk ka pranuar përgjigje.
Ndërkaq, hetimet janë duke vazhduar për zyrtaren tjetër policore, Lumnije Behluli, e cila gjithashtu është e angazhuar në njësinë për hetimin e krimeve të luftës.
Ish-shefi i hetimeve në IPK, Jetullah Aliu, thotë se për shkak të ndjeshmërisë së veprës penale, për rastet e spiunazhit duhet bërë hetime më të detajuara.
“Konsideroj që po, mirëpo për këtë arsye janë institucionet dhe organet e sigurisë që duhet të ndërmarrin veprime hetimore me qëllim që të sqarohet dhe të vërtetohet se të njëjtit kanë kryer apo nuk kanë kryer vepra penale dhe në kuadër të kësaj konsideroj se Prokuroria Speciale dhe në këtë rast edhe Inspektorati posa të kyçet në këtë rast do t’a vërtetojnë se është kryer një vepër penale sepse kemi të bëjmë edhe me prezumimin e pafajësisë”, është shprehur Aliu.
Për veprën e spiunazhit, në korrik ishte arrestuar edhe togeri Bojan Jevtiq nga nacionaliteti serb, i cili dyshohej se kishte shpërndarë dokumente konfidenciale te BIA serbe.
