Dega e Lëvizjes Vetëvendosje në Prishtinë ka reaguar për arrestimin e zyrtarëve në kryeqytet, të cilët dyshohet për keqpërdorime të detyrës zyrtare.
Sipas VV-së, këto arrestime nuk bëjnë fjalë për veprime individuale, por se kanë të bëjnë me veprimtari “kriminale të koordinuar e organizuar në hierarki të pushtetit lokal në Prishtinë”.
“Arrestimi i Shefit të personelit të Komunës së Prishtinës, një nga bashkëpunëtorët më të afërt të Kryetarit Rama, ish-asamblisti dhe anëtari i Këshillit të Përgjithshëm të LDK-së, z.Fadil Aliu – Hërtica, arrestimi i ish-Drejtorit të Qendres për Punë Sociale të Prishtinës, z.Vehbi Mujku, i dorëhequr ditë më parë, arrestimi i shefes së Njësisë së Shërbimeve Sociale, Znj.Valbona Makiqi, si dhe intervistimi i Nënkryetarit të Prishtinës, z.Alban Zogaj, është dëshmia më e mirë dhe e pakontestueshme e kaosit ligjor në të cilin është zhytur Komuna e Prishtinës”, thuhet në komunikatë.
LVV, thotë se përgjegjësia i takon kryetarit të Prishtinës, Përparim Ramës, të cilin e akuzojnë për veprime të paligjshme.
“Si opozitë lokale vazhdimisht kemi ngritur zërin për parregullësitë dhe shkeljet ligjore që kanë ndodhur e vazhdojnë të ndodhin tash e dy vjet në çdo segment të qeverisjes në Kryeqytet. Prishtina tani, nën qeverisjen LDK-PDK, është shndrruar në qytet kampion për paligjshmëri, padrejtësi e anarki. Nuk ka dyshim se përgjegjësia kryesor për këtë gjendje bie mbi të parin e Kryeqytetit, Përparim Ramën, për shkak të veprimeve të tij paligjshme, e të cilat tashmë çdo ditë po shpërfaqen në opinion”, thuhet mes tjerash në komunikatë”./teve1.info/
