Partia Demokratike e Kosovës (PDK), ka reaguar pas arrestimeve të sotme nga Gjykata Speciale.
Në një reagim PDK ka kërkuar që të ruhen standardet dhe paanshmëria.
“PDK thekson rëndësinë e ruajtjes së standardeve më të larta të drejtësisë dhe të paanshmërisë, që janë gurthemeli i funksionimit të çdo institucioni gjyqësor, përfshirë Dhomat e Specializuara. Besojmë fuqimisht se drejtësia dhe paanshmëria nuk janë vetëm kërkesa, por kushte të domosdoshme për një proces të drejtë dhe të besueshëm. Dhomat e Specializuara u krijuan për të siguruar drejtësi, bazuar në standardet evropiane dhe jo për të krijuar spektakle publike në emër të saj. Çdo devijim nga ky mandat, përmes veprimeve që mund të minojnë besimin e qytetarëve dhe integritetin e drejtësisë, konsiderojmë se është i gabuar”, thuhet nga PDK.
Në komunikatë është theksuar, se është thelbësore që të gjitha proceset e zhvilluara nga Dhomat e Specializuara të jenë të bazuara në transparencë të plotë dhe pa tejkaluar kompetencat e tyre.
“Si PDK, shprehim shqetësimin tonë në lidhje me vonesat e gjata dhe mungesën e transparencës në proceset gjyqësore ndaj ish-udhëheqësve të Ushtrisë Çlirimtare të Kosovës dhe zyrtarëve të lartë shtetërorë”, thuhet tutje.
Të enjten me urdhër të Gjykatës Speciale janë arrestuar, Isni Kilaj, Fadil Fazliu dhe Bashkim Smakaj.
Gjatë ditës është bastisur edhe shtëpia e ish-zëvendëskryeministrit Hajredin Kuçi.
