Policia e Kosovës ka dhënë detaje shtesë lidhur me rastin që ndodhi të premten në shkollën e mesme “Kuvendi i Arbërit” në Ferizaj, ku një nxënës 15-vjeçar humbi jetën pasi u rrëzua pa ndjenja gjatë orës së edukatës fizike.
Sipas njoftimit zyrtar, rasti është raportuar pasditen e sotme, në rrugën “Brahim Ademi”. I mituri dyshohet se është rrëzuar në sallën sportive në rrethana që ende nuk janë sqaruar.
Policia ka bërë të ditur se nxënësi është transportuar me urgjencë në Qendrën Emergjente në Ferizaj, mirëpo, pavarësisht ndërhyrjes mjekësore, ai ka ndërruar jetë.
Bazuar në raportin e mjekut kujdestar, viktima dyshohet se ka pësuar arrest kardiak. Me rekomandim të mjekut dhe vendim të prokurorit të shtetit, trupi i pajetë është dërguar në Institutin e Mjekësisë Ligjore për obduksion, me qëllim të sqarimit të plotë të shkakut të vdekjes.
Ndërkohë, njësitet relevante policore, përfshirë hetuesit dhe krimteknikët, kanë dalë në vendin e ngjarjes dhe kanë ndërmarrë të gjitha veprimet e nevojshme hetimore.
Rasti është iniciuar si “hetim mbi vdekjen”, ndërsa autoritetet po vazhdojnë hetimet për të zbardhur plotësisht rrethanat e kësaj ngjarjeje tragjike. /teve1.info/
Ndërron jetë një nxënës 15-vjeçar në ambientet e shkollës në Ferizaj
